| CARTA
DA COORDINADORA POLA DEFENSA DO LITORAL DO MORRAZO AO SR. TOURIÑO
Sr. Presidente SANTIAGO Estimado Señor: Por medio da presente dirixímonos a Vde. co fin de reclamar a súa atención sobre os feitos que están afectando gravemente á costa de Galicia, especialmente ás Rías Baixas, e tendo como negativos exemplos o que está a acontecer nos concellos do Morrazo. Como sabe, Sr. Presidente, o uso e o coidado que unha sociedade da ó seu territorio reflexa a súa situación, a súa sensibilidade e a súa cultura, a súa capacidade de adaptación... : o seu ser. Galicia ten unha das costas mais ricas, variadas e fermosas de Europa, que sustentan no material e espiritual a un pobo volcado ó mar. Durante as últimas décadas estas costas están sufrindo cambios vertixinosos; a construcción voraz e o desenvolvemento especulativo e o afán privatizador esténdense rapidamente polas marxes das rías e praias, chegando incluso as beiras dos acantilados, inundándoas de casas, chabolas, carreteiras, tendidos, portos deportivos, etc... nun descomunal desorde. Incluso zonas apartadas e ata fai pouco virxes son ocupadas no vran por multitudes de visitantes que sen que nada o impida chegan co seu coche ata a beira mesma do mar, degradando a vexetación e os areais e enchendo o litoral de lixo. A lista de problemas non remata aquí: a contaminación das augas por vertidos urbanos e industriais, os aterramentos, a degradación dos ecosistemas terrestres, etc., son cuestións que a todos soan, non é necesario esgotar o rosario de problemas para facer un diagnóstico sombrío: o noso litoral está en crise. Fronte a estes problemas pouco se ten feito. Certamente hai casos puntuais meritorios, como a declaración do Parque Nacional das Illas Atlánticas, ou os pasos dados polo seu Goberno para permitir a primeira Reserva mariña de Galicia fronte as costas de Carnota, ou a paralización das Normas de algún concello dos muitos que non cumpren a Lei; pero o que campa as súas anchas é a tolerancia, a desidia, o populismo barato de votos para hoxe e fame para mañan, e a impresión, espallada na cidadanía, de que case todos os responsables políticos consideran o seu cargo non como un servicio ós cidadáns co que velar polo ben e o patrimonio comúns senón como unha plataforma para facer negocios, promocionarse politicamente ou servir a intereses particulares. As rías son ecosistemas naturais que teñen un valor ambiental e económico, ademais de cultural, incalculable; e calquera actuación sexa da Administración que sexa debe ser respectuosa con eses valores e escrupulosa no cumprimento da Lei, primando o interese social por enriba dos intereses particulares. A postura das Administracións Públicas, Sr. Presidente, non debe ser a de escorrer o bulto ou competir por ser quen menos protexe, senón a de garantir a conservación dun patrimonio que debe ser orgullo de todos. Por tal motivo, os abaixo asinantes, que representamos a diferentes colectivos ambientais, culturais e sociais da Comarca do Morrazo, pedímoslle:
1. A paralización cautelar do Expediente de construcción do Porto Deportivo de Massó, en Cangas, e ordene unha investigación das irregulares actuacións administrativas levadas a cabo pola Autoridade Portuaria de Vigo, que está a causar un gran malestar social entre os mariñeiros e o pobo de Cangas, e que foi motivo xa dunha pregunta Parlamentaria e provocou manifestacións e a paralización das obras por parte dos veciños dende hai mais de seis meses. 2. A paralización tamén do pretendido e irreparable proxecto de aterramento da fermosa praia urbana de Pescadoira en Bueu, e se solucionen os problemas derivados da construcción do espigón do porto actual e que están a provocar a súa desaparición. 3. O estudio de posibilidades técnicas para deter o basculamento da praia de Beluso, xa anunciado coa construcción do superfluo porto realizado por Cuíña. Que se estudie como posibilidade o desmantelamento de dito porto. 4. O prometido traslado de ENCE e a pronta rexeneración ambiental da zona. 5. Unha moratoria na construcción de portos deportivos e recheos portuarios, en tanto non se estudien os impactos e as súas repercusións sobre os ecosistemas mariños e estean construídos en base as criterios de sostibilidade, necesidades reais e non a intereses especulativos. Débese facer unha planificación conxunta das rías e un adecuado seguimento posterior, no Porto de Marín se fixeron recheos dunha superficie seis veces maior da aprobada e en Vigo, o ilegal e pernicioso recheo de Bouzas non para de aumentar. 6. O máximo control sobre a planificación urbanística dos concellos do Morrazo e Rías de Pontevedra e Vigo, rexeitando crecementos fantasiosos, orzamentando servicios e saneamento adecuados a poboación actual e prevista, e salvagardando os valores naturais, paisaxísticos e medioambientais. 7. Sensibilidade e accións rexenerativas que axuden a encaixar o alto impacto provocado polo Corredor do Morrazo e a Variante de Marín. Promoción do bosque autóctono. Medidas contra a usurpación de terreos comunais e respecto a idiosincrasia e o patrimonio sociocultural. 8. Que se inicien os trámites para a inclusión no Parque Nacional das Illas Atlánticas dos territorios continentais de Costa da Vela (Cangas), Cabo Udra (Bueu) e Illa de Tambo (Marín), que ofrecerían unha nova perspectiva do espacio, novas posibilidades para unha xestión máis eficaz e despexarían a dúbida de calquera posible acción especulativa no futuro. 9. Que se definan e regulamenten coa maior premura as zonas da Rede Natura 2000 de Udra, Costa da Vela e Enseada de San Simón e que mentras non se leve a cabo esa regulamentación se aplique a normativa europea de Redes Natura co máximo rigor nas zonas declaradas e nas súas areas limítrofes. 10. Se inicien os trámites, tal como manifestou Vde. en algún momento, e figura no programa electoral do Ps de G - PSOE, para a declaración das Rías Baixas como Reserva da Biosfera, o que contribuirá sen dúbida a súa proxección internacional, a un desenvolvemento ben entendido e construído coa participación de todos e todas. Saiba, Sr. Presidente, que contará co noso apoio para estas iniciativas e outras que poida tomar co fin de preservar o valioso patrimonio natural que representan as Rías e as súas costas. Reciba un atento saúdo
|