A un ano do ditame do Grupo de Traballo da ONU
A xustiza burlada: os 5 continúan en prisión

Andrés Gómez- Rebelión

O 27 de maio pasado fixo un ano que o Grupo de Traballo sobre Detencións Arbitrarias da Comisión de Dereitos Humanos da ONU declarou arbitraria a detención e prisión dos Cinco: Gerardo Hernández, Ramón Labañino, Antonio Guerrero, Fernando González e René González, por contravir o artigo 14 da Convención Internacional de Dereitos Civís e Políticos, e instou ao governo de Estados Unidos a adoptar as medidas necesarias para solucionar esta situación.

O Grupo de Traballo sobre Detencións Arbitrarias, un dos mecanismos especiais da Comisión de Dereitos Humanos da ONU, que se compón de cinco expertos, foi estabelecido en 1991. Hai un ano, en maio do 2005, compoñia-no expertos do estado español, Hungría, Irán, Paraguai e Arxelia. Como consta, tres dos expertos proveñen de países cuxos governos son aliados de Estados Unidos.

O Grupo de Traballo adoptou esta decisión como resultado da solicitude que lle fixeran persoalmente en Xenebra no 2003 os familiares dos Cinco e despois de avaliar os argumentos brindados, tanto polos familiares, como polo governo de Estados Unidos.

O governo de Estados Unidos rexeitou o ditame do Grupo de Traballo desprezando así unha vez máis á xustiza no seu ensañamento cos Cinco. De igual xeito mantén aos Cinco inxustamente presos –por case oito anos- a través dunha detención e un proceso xudicial na súa contra baseados en acusacións falsas. Hai xa dez meses dende que o Tribunal de Apelacións do Onceno Circuito, composto por tres xuices, nomeado polo Pleno do Tribunal de Apelacións dese Circuito, ditaminara unánimemente a anulación do xuizo dos Cinco, determinando a revocación das súas condenas. Mais non foron liberados. A través de enmarañados procesos de apelacións nos tribunais, que burlan á xustiza, os Cinco –inocentes- continúan encarcerados, baixo condicións penosas.

O ditame do Grupo de Traballo é extremadamente importante xa que é o mecanismo aceptado polos Estados Membros para que a ONU faga valer os seus criterios sobre os aspectos do Dereito Internacional que se relacionan con estes casos.
¿En que se basea a decisión do Grupo de Traballo? Para coñecer as súas conclusións cito da súa Opinión con relación aos Cinco:
“Despois do arresto, e independentemente do feito de que os detidos foran informados do seu dereito a gardar silenzo e de que o Governo lle facilitara a defensa, foron mantidos en confinamento solitario durante 17 meses, durante os cales a comunicación cos seus avogados e o acceso á evidencia e, con isto, as posibilidades dunha defensa adecuada viron-se debilitadas.

Como o caso foi clasificado como de seguridade nacional, viu-se afectado ao acceso por parte dos detidos aos documentos que contiñan a evidencia. O Governo non refutou o feito de que os avogados da defensa tiveron un acceso moi limitado á evidencia debido a esta clasificación, o que afectou negativamente a súa capacidade para presentar evidencia contraria. (…)
O Governo non negou que o clima de predisposición e perxuizo contra os acusados en Miami persistiu e contribuiu a presentar aos acusados como culpábeis dende o principio. Non foi impugnado polo Governo o feito de que un ano máis tarde o mesmo admitiu que Miami non era o lugar axeitado para celebrar un xuizo onde estaba probado que era case imposíbel seleccionar un xurado imparcial nun caso vinculado con Cuba.

O Grupo de Traballo observa que a partires dos feitos e circunstancias en que se celebrou o xuizo e da natureza dos cargos e das severas sentenzas dadas aos acusados infire-se que o xuizo non tivo lugar no clima de obxetividade e imparcialidade que se necesita para concluír que cumpre coas normas dun xuizo xusto, como se define no Artigo 14 da Convención Internacional de Dereitos Civís e Políticos, da cal Estados Unidos é parte.

O Grupo de Traballo chega á conclusión de que os tres elementos enunciados arriba, no seu conxunto, son de tal gravidade que confiren á privación de liberdade destas cinco persoas un carácter arbitrario.”
Seguido, o Grupo de Traballo insta ao governo de Estados Unidos a adoptar as medidas necesarias para remediar esta situación de conformidade co Dereito Internacional.

Este ditame coincide e confirma os argumentos esenciais do equipo de avogados da defensa dos Cinco e da decisión do Tribunal de Apelacións do Onceno Circuito que en agosto pasado anulara o xuizo e revocara as súas condenas.
Todos sabemos a resposta do governo de Estados Unidos ante estas abrumadoras probas de iniquidade, a cal demostra o seu desprezo polo imperio da lei e a xustiza.

* Andrés Gómez, director de Areítodigital