En relación ao acordo plenario sobre o Hospital da Escola Naval
No último pleno do concello de Marín, celebrado o venres 14, aprobouse co apoio de todos os grupos a iniciativa dos independentes de dirixirse ao Ministerio de Defensa para ver as posibilidades de cesión do antigo hospital da Escola Naval, agora en reformas para facer unha residencia de oficiais, para convertilo nun centro de saúde ou centro de día.
O Colectivo Nacionalista xunto con veciños e veciñas de marín constiuíron a Plataforma Polo Uso Civil do Hospital Militar liderando en 2004 a mesma iniciativa que agora se aprobou no último pleno, chegando a recoller máis de 3000 asinaturas nun prazo de dúas semanas que avalaban a petición da cesión para o uso civil do hospital que daquela estaba infrautilizado. Como resposta a esta iniciativa, e ás asinaturas que a avalaban obtivemos tanto por parte do anterior goberno, do cal formaba parte Mar-In, como pola oposición o pasotismo e o desprezo ao non interesarse nin querer tan sequera reunirse cos/coas veciños/as que defendiamos a proposta.
Dada a situación de abandono por parte do concello e dos grupos políticos que o conformaban, a plataforma optou por presentar a iniciativa en cantos organismos fora necesario, así presentou as asinaturas na delegación provincial de sanidade chegando a reunirse dúas veces co responsábel de sanidade da provincia, primeiro coa delegada do PP en abril do 2004 e co cambio de goberno na Xunta co novo delegado en decembro de 2005. Debido á proximidade do concello de Bueu tamén se mantivo unha reunión co alcalde da vila veciña amosando este, aínda que só fora cousa de talante, un interese que xamais percibimos en ningún/ningunha dos/as concelleiros/as de Marín.
No mes de decembro de 2005 o Colectivo Nacionalista recibiu como resposta do Ministerio de Defensa a promesa de estudar a proposta que anteriormente lle fora remitida mediante carta. Xusto un ano despois, en decembro de 2006 coñecíamos que o Ministerio de Defensa non tiña previsto ceder terreos ou edificios da súa titulariedade ao concello e que ademais, como xa sabía o Colectivo Nacionalista, non tiñan coñecemento de que o concello solicitara nada neste sentido.
Aínda que semella un pouco tarde, xa que as obras para transformar o hospital nunha residencia de oficiais xa comezaron e están algo avanzadas, queremos amosar o noso apoio ao concello para levar adiante esta proposta, emprazando ao alcalde a que dende o seu escano no parlamento do estado presente unha proposición non de lei demandando do goberno do estado o traspaso do hospital.
Por último non podemos deixar de preguntarnos canto teríamos avanzado se o sectarismo co que actúan os partidos lles deixara ver un pouco máis aló dos seus egos e daquela apoiaran a iniciativa levando o peso das xestións.
Marín, 17 de decembro de 2007.
