Escrito presentado no concello solicitando a implantación de medidas de reciclaxe e recollida de residuos

Un dos principais problemas que teñen que enfrontar as sociedades modernas é o tratamento dos residuos sólidos, e máis concretamente os concellos teñen a obriga e, polo tanto o gasto, de xestionar a súa eliminación.

A privatización do servizo e a inclusión en Sogama provoca que os custes para a administración local en Marín, e para os cidadáns no pago dos seus recibos, sexan elevados, polo tanto fanse necesarias alternativas que fagan este proceso económico e ecolóxico mediante a reutilización, a redución e a reciclaxe do lixo.

Unha medida que se está extendendo en moitos concellos é a implantación de composteiros individuais para a realización do compost dun xeito individual, fundamentalmente en zonas rurais.

A implantación da compostaxe individual é viábel para a produción de compost destinado a hortas ou xardíns, fomentando ao mesmo tempo prácticas tradicionais que pouco a pouco se foron perdendo coa modernidade do contentor ao lado da casa.
Este tipo de medidas debe ir acompañada dunha campaña de sensibilización e coñecemento do sistema, así como dos seus beneficios individuais e para o conxunto da sociedade. Beneficios ecolóxicos e tamén económicos, xa que unha implantación axeitada supón a redución do volume de lixo a tratar e a enviar a planta incineradora de Sogama.

Outra das necesidades urxentes que debe solucionar a administración local é o tratamento correcto dos aceites domésticos que hoxe van polo vertedoiro xa que carecemos dun sistema de recollida e traslado dos mesmos.

O aceite usado é un residuo que provoca a obstrución de cañerías e serve de alimento aos ratos, sendo ademais un factor de encarecemento da depuración das augas residuais. Faise necesaria unha actuación destinada a facer as nosas casas un pouco máis ecolóxicas.

Hai métodos e sistemas de recollida e recuperación dos aceites que se están implantando con éxito, como por exemplo no concello de Mondragón mediante un sistema desenvolto por estudantes universitarios, que consiste na instalación de contentores onde depositar estas sustancias que devolven un novo envase para acumular os aceites na casa.

Conséguese desta forma reducir a contaminación e tamén aproveitar estes aceites para a elaboración do biodiesel sen ter que recorrer a especies vexetais para o consumo humano, podendo xerarse un beneficio coa venda do produto recollido.

Estas dúas actuacións teñen que desenvolverse cunha campaña publicitaria das medidas e dos procesos a seguir, tanto na recollida de aceites como da elaboración do compost. Trátase de acadar a implicación da cidadanía e incrementar a sensibilidade desta cara a conservación do medio ambiente.

É por todo isto polo que SOLICITAMOS:

1. Que se desenvolva por parte do Concello de Marín un plano para implantar a compostaxe individual, fundamentalmente no medio rural.
2. Que se estude e se implante un sistema de recollida dos aceites domésticos usados.
3. Que estas actuacións conleven as correspondentes campañas informativas para garantir o éxito das mesmas e unha maior concienciación dos cidadáns na conservación do medio ambiente.

Marín, 3 de agosto de 2007.