Análise Xeral

Asistimos estes dias a un contínuo lamento e cabreo do persoal devido ao resultado eleitoral.
1º Estamos diante dunhas eleicións municipais, non autonómicas nen xerais. Cada concello é un mundo e os electores botan ou votan tendo en conta as persoas que se apresentan no seu concello.
2º O PP, queiramó-lo ou non, ten unha estrutura superior á de calquer outro partido político na Galiza. A sua implantación e o seu traballo (gostenos ou non este traballo) é unha realidade, hai están os resultados. É certo que son redes caciquis, de favores, etc. é o seu xeito de traballar.
3º Para quitar do medios ao PP fan falla proxectos políticos claros, implantación organizativa, moito traballo pola base. Non valen as campañas de marketing de última hora, con candidatos impostos e importados por cúpulas políticas que non teñen nen puta idea de como funcionan as localidade deste pais.
4º Nen o PSOE, nen o BNG teñen hoxe en dia capacidade para acabar co PP. Estes dous partidos políticos están máis preocupados en facer campañas mediaticas e confeccionar listas con "titulados". Asi non se gañan as eleicións.
5º Está claro que non hai unha alternativa clara nestes momentos. O PP é un partido de dereitas, pero o PSOE e o BNG cando governan non se diferéncian moito deste partido. Ademáis, os tres queren acadar o mesmo eleitorado, o de "centro", unha cousa moi ambigua que provoca como pasou nestas eleicións que os programas eleitorais, as promesas, foran as mesmas. Cambian as tácticas dos partidos, cando o que hai que facer é cambiar á sociedade.
Asi non vamos a nengunha parte.

Marin, unha vila distinta

Na nosa vila a situación prácticamente non se modificou. Os resultados deixaron ao PP e ao PSOE co número de concelleiros que tiñan, 7 e 8 respectivamente. A outra forza política que existia formalmente, o BNG tiña 6 concelleiros ao comezo da anterior lexislatura, dividiu-se na práctica mantendo 3 concelleiros e os "independentes" de Mar-In, expulsados do BNG, quedando-se cos outros 3.
Analisando os resultados podemos chegar á conclusión de que todos perderon.

O PP non acadou remotar os seus malos resultados de fai catro anos, quedando-se nos 7 concelleiros, apesar de "arrasar" no rural. Este partido non dou asimilado os malos resultados das anteriores eleicións e estivo vexetando na oposición catro anos.

O PSOE mantivo-se nos 8 concelleiros pese a ter o governo municipal e facer un feixe de obras eleitorais este último ano no centro da vila onde tamén "arrasaron". A suba da taxa do lixo puido ser un dos freos a un "cantado ascenso".
Mar-In foi a sorpresa, nadie daba un peso por eles ao comezo da campaña. Nen eles mesmos crian posíbel sacar 3 concelleiros e superar en votos ao BNG. A política clientelar en cultura e deporte poden explicar estes resultados, xa que unha forza deste tipo nunca acadou máis dun concelleiro en Marin.
O BNG foi claramente o gran perdedor destas eleicións municipais. Pasou de 6 a 3 concelleiros, colocando-se nuns resultados similares ao ano 1989. Esta forza política quedou reducida á marxinalidade eleitoral e tamén organizativa. Son catro e un tambor. A imposición dun candidato que ia "agrupar ao nacionalismo en Marin" e "abrir-se a novos sectores" demostrou-se desastrosa. A Executiva Nacional do BNG deveu-se inspirar na Vida de Bryan á hora de actuar en Marin, resucitando mortos políticos e facendo unha operación triunfo para buscar un candidato. Quen asumirá a responsabilidade deste descalabro? Seguramente ninguén.

Non cambiou nada numericamente, cualitativamente si houbo un cámbio moi grande. Na nova corporación non vai existir nengunha forza política cunha concepción alternativa e apegada ás clases populares, que defenda os intereses do conxunto da sociedade.

PP, PSOE, BNG e Mar-In, todos peleados na campaña eleitoral argumentando con programas idénticos, slogans idénticos, promesas idénticas, manteñen programas eleitorais ocultos. Nengun falou en campaña dos problemas reais que ten o noso concello. Nengun deles mentou o problema dos xulgados e o seu posíbel traslado, nengun falou de futuras privatizacións que realmente están próximas, nengun falou da nave que Tecmed quer construir na pardavila, nengun falou dunha menor presión fiscal para os máis necesitados, nengun ten un programa de promoción económica do noso concello. Esta campaña dou a sensación de ser un casting de Operación Triunfo, onde todos representaban o mesmo papel.

Marin vai padecer catro anos máis unha situación de parálise política en mans duns partidos que teñen como único interese manter-se apegados ao poder municipal.
É necesária unha nova alternativa para o noso povo, unha alternativa política distinta, que defenda os intereses do conxunto da sociedade, das clases populares...

Marin, 29 de Maio de 2003.