Non hai peor xordo que o que non quere oir.

A comezos de ano o Colectivo Nacionalista remitiu-lle unha petición á Autoridade Portuaria de Marin, expoñendo os nosos argumentos para que tanto a rotulación do porto e a comunicación tanto interna coma externa se fixera en galego.
A resposta que recibimos non foi a esperada, posto que coa excusa de pertencer á Admón. Xeral do Estado a presidenta da Autoridade Portuaria negou-se a facelo. Isto non fixo que o Colectivo Nacionalista deixara de insistir, e inmediatamente volvemos remitir outra petición con máis e novos argumentos. Aínda non nos respostaron, pero segundo se pode ver no porto, non fan ningún da nosa petición.
Agora non só está a rotulación externa do porto en castelan obviando o galego senón que tamén toda a nova sinalización está no mesmo idioma, deixando ao galego en fora de xogo.
O galego non é como se di unha lingua minoritaria, senón que é unha lingua minorizada polo maltrato que recibe dos estamentos sociais, institucións públicas e meios de comunicación que en vez de respeitar o que din as leis fomentando o uso do galego en todos os planos da vida publica, cultural e informativa, desprezan o seu uso deixando en fora de xogo a milleiros de galegofalantes.
Cando estamos a ver últimamente os pasos que esta dando o governo do estado para o recoñecimento oficial na UE do Galego, Euskera e catalán, os seus compañeiros de partido en Marin a pesar da petición remitida ao concello polo noso colectivo, non fai nada para cambiar esta situación, a pesares de estar incluidos no consello da Autoridade Portuaria, o que nos leva a pensar nunha actitude hipócrita por parte do PSOE, que cara fora fai unha cousa e logo dentro fai outra.
O presidente da Xunta de Galiza, o dinosaurio Fraga dixo recentemente que a Europa parecería a torre de Babel de chegar a recoñecer-se oficialmente o galego na UE. Xa dicía Castelao no seu "Sempre en Galiza" que a torre de Babel non fora ningún castigo senón todo o contrario xa que a variedade de culturas, linguas, de modos de viver e pensar son xeitos de superación para crear civilizacións cada vez mellores e que os burros aínda seguen a falar o idioma universal.
Dende o Colectivo Nacionalista de Marin pedimos e seguiremos a pedir que o galego como lingua da nosa terra sexa respeitada e que polo tanto sexa usada por todas as administracións publicas na Galiza sen ningún tipo de discriminación con respeito ao castelán.