O 45% do censo de Marín non participou no proceso electoral

Os resultados do proceso electoral que acabamos de pasar supuxeron unha sorpresa para moitos, incluídos os protagonistas. Realmente ninguén esperaba unha caída tan grande dos partidos do goberno municipal, nin a suba que tiveron os da oposición.

Podemos deducir que o goberno desgastou á coalición PSOE MAR-IN, e @s cidadáns/ás fixéronlles pagar nas urnas catro anos de falla de iniciativas, pasividade e de nula xestión. Estiveron agardando toda a lexislatura para nos seis últimos meses realizar catro cambios estéticos en varias rúas e a remodelación da praza da abastos. Iso non chega para un pobo como Marín que precisa dunha atención ás súas necesidades culturais, de xestións administrativas, de coidado d@s maiores e de alternativas de lecer para a xuventude.

Estivemos padecendo un goberno incapaz de dialogar coas distintas administracións e incapaz de dialogar cos veciños e veciñas, incluso ás veces o trato no era nada amábel. Atrincheirados no concello só tiveron capacidade para xestionar o día a día sen ningún tipo de molestia por parte da oposición que tampouco destacou pola súa capacidade opositora.

Hai que recoñecer que sorprenderon as subas do PP e do BNG. O Partido Popular foi quen de manter a fidelidade da súa ampla base electoral en Marín, moito máis cando o baile de candidatos non lles favoreceu nada, como tampouco a aparición de dúas candidaturas de "rebotad@s" (PG e Terra Galega) que xogaron no seu campo de influencia.

Nin no BNG esperaban unha suba de dous concelleiros, tendo en conta que nestes catro anos a oposición que fixeron foi sempre oportunista e abstencionista. Adicáronse a pasear conselleir@s e directores/as xerais ou provinciais facendo promesas e vendendo fume, pero sen soltar un euro á hora de facer os orzamentos da Xunta.

Mención especial merece o malestar causado co PXOM, a pesar de que este debe ser repartido entre todos os partidos con representación no concello, e que con máis de 3.000 alegacións foi un dos máis contestados do Morrazo. Non podemos obviar as repercusións do Plano no proceso electoral cando vai afectar a moitos veciños e veciñas de Marín no seu futuro. Todo fai pensar que o custe en votos pagárono os gobernantes, mais cada partido nos seus programas e nas súas manifestacións públicas ao longo da campaña fixo fincapé en que ían levar adiante o PXOM.

Algo falla cando aparecen novas candidaturas (Terra Galega, PG e GEL) que cuestionan o traballo dos partidos tradicionais e a abstención volve subir, sendo maior que a media galega. Son síntomas de que a sociedade entende que non se están facendo ben as cousas na política municipal e demanda un cambio. A abstención en Marín, o 43,18%, é maior que a media galega, 37,03%, e sofre un incremento en relación ás anteriores municipais que era do 40,42%; increméntanse tamén os votos en branco, que representan o 2,10%. Case o 45% do censo non opta polos partidos que se presentan ás eleccións.

O novo goberno poder ser só un cambio de parella para o PSOE, unha vez máis pode manterse á fronte da alcaldía como xa fixo nas dúas lexislaturas anteriores optando esta vez polo pacto co BNG. Esto parece o máis factíbel, xa que as discrepancias entre os dous son máis "estéticas" que de fundo e propias da dinámica de campaña permanente na que se atopan os partidos políticos.

Onde van quedar os bonitos programas electorais con fotos a toda cor que nos ofreceron na campaña? Nestes catro anos que teñen por diante van facer e desfacer sen poñer en práctica a "democracia participativa" e, polo tanto sen ter en conta a opinión dos veciños e veciñas de Marín. Os programas son para as campañas electorais.

Goberne quen goberne, o único certo é que van seguir adiante co PXOM, un proxecto no que todos estaban e están de acordo, coa conseguinte repercusión social. As persoas que alegaron, que teñen as súas casas e os seus terreos afectados non gañaron nada nin teñen motivos de ledicía por estes resultados. Tan só nos queda confiar en que agora cando veñan de paseo @s conselleir@s e directores/as xerais teñan os petos cheos de cartos para deixar algo en Marín.

Dende o Colectivo Nacionalista, independentemente de quen goberne Marín, seguiremos a esixir unha democracia participativa onde o pobo sexa tomado en conta, e facendo demandas como a construción dun novo centro de saúde, a construción dunha nova biblioteca, a protección e posta en valor do amplo patrimonio arqueolóxico, do noso litoral e dos nosos ríos, a construción de vivendas sociais, un centro de día para @s maiores, e moitas cousas máis sexan feitas realidade.

Agora é o pobo de Marín ten a obriga de fiscalizar e demandar que todas as promesas que nos fixeron se fagan realidade.

Marín, 31 de maio de 2007