O Concello de Marín e a Delegación Provincial de Costas da Xunta veñen de conceder autorización para levantar un muro diante da construción ilegal no asteleiro da Praia do Santo. Unha obra anteriormente paralisada polo propio concello ao estar afectada pola servidume de protección do dominio público maritimo terrestre e lindando cun camiño.
Unha edificación que ten aberto un expediente sancionador por parte da propia Xunta vaise ver agora mellorada pola concesión dun permiso para facer un feche sobre uns terreos públicos que teñen que ser protexidos e reclamados pola adminstración. Estamos ante un novo despropósito, un máis a xuntar ás patéticas actuacións por parte do Concello e da Xunta ante esta obra ilegal.
Temos que lembrar que a construción deste muro vai ocupar uns terreos arranxados polo Servizo de Costas e o Concello de Marín cando era responsábel da área o Sr. Portela, para evitar que a actuación do mar non seguira levandose a baixada á praia. A concesión da licencia faise en base á situación actual da zona e non se ten en conta esta actuación, que coa lexislación na man todo o obrado hai que incorporalo ao Dominio Público Marítimo Terrestre segundo o art. 4 da Lei de Costas.
Non podemos senón denunciar públicamente o “regalo” que se está facendo en prexuizo dos intereses de todos os veciños e veciñas de Ardán e Marín.
A forma de levar o urbanismo na nosa vila é desastrosa e claramente beneficiosa para os intereses dos infractores e dos especuladores. Exemplos temos abondo sen sair da parroquia de Ardán: a instalación dunha casa prefabricada nunha zona forestal, a transformación deste asteleiro en chalet, a colocación dunha antena (que grazas á presión veciñal foi retirada) coa colaboración da policía municipal ou vertidos de terra na zona de Pastoriza. E poderiamos seguir polo resto de Marín facendo unha relación de actuacións urbanísticas lamentábeis como as efectuadas no río Lameiriña ou na fonte da Banda do Río.
Está claro que con estes precedentes estase incitando a todas aquelas persoas que queiran infrinxir as normas urbanísticas a que o fagan, pois o castigo e a persecución das infracións por parte dos responsábis do urbanismo en Marín é nula.
Reclamamos do Sr. Vilaboa e ao BNG que deixen de favorecer aos especuladores e infractores e fagan cumprir a legalidade e non enganen aos veciños decindo que fan o que dispois non fan. Xa sabemos que son moi amigos de xuntarse con empresarios, pero a administración dun concello tense que facer para o conxunto do pobo, non para uns poucos polo que pedimos que se reconsidere a licencia concedida e se paralice calquer actuación nesta zona.
Marín 10 de abril de 2008.