Os orzamentos do PSOE e o BNG discriminan a Marin como o facian os do PP.

O governo da Xunta apresentou os orzamentos para o ano 2006 como os da modernización económica e crecemento, os do emprego estable e de calidade, da mellora da sanidade, do compromiso social e do equilibrio territorial. Son estas unhas premisas coas que todo o mundo esta dacordo e os cidadáns esperan que calquer governo as leve adiante.

Agora ben, estes principios xenericos tan fermosos parece que se diluen cando se trata de levalos á práctica a nível municipal. A proposta de orzamentos da Xunta para o 2006 é un calco das anteriores, un ano máis só fan referencia a Marin en duas partidas. A variante de Marin, 15 millón de euros para a circunvalación que corresponderian ao noso concello e a Pontevedra, e unha mínima partida de 330.000 euros para a construcción do auditorio.

Todas as xuntanzas que efectuaron o alcalde e os concelleiros do equipo de governo municipal parece que non serviron de moito, e so recibiron promesas por parte dos responsábeis políticos autonómicos. A Xunta do PSOE e do BNG da o mesmo tratamento que historicamente veu dando o PP a Marin. O talante e o sentidiño son unicamente propaganda que non se aplica á hora de governar e distribuir os cartos públicos.

Estamos ante unha proposta que volve ser moi indeterminada na sua concrección para que o governo poida dispoñer ao seu libre albedrio e facer un reparto en función dos seus intereses partidarios e electorais. O cambio parece que consiste en que nada cambie e a política do reparto caciquil segue implantanda na Xunta.
Un ano máis temos que salir publicamente a manifestar o noso rexeitamento a uns orzamentos que esquecen a débeda que ten a Xunta de Galiza con Marin, un povo esquecido nos últimos exercicios. Os únicos “agasallos” que nos fixeron os governos do PP foron o início das obras da circuncalación pero sen determinar o seu remate e o seu trazado, e un apeadero que nos quixeron vender como estación de autobuses.

O que lamentamos é que desta vez non imos coincidir nas críticas co BNG e o PSOE. Se os primeiros afirmaban o ano pasado que os orzamentos eran negativos e que non se tiñan en conta as necesidades fundamentais da comarca e que o PP facia unha utilización clientelar e arbitraria dos mesmos, os segundos denunciaban a falla de obras fundamentais e anunciaban emendas para que Marin tivera máis inversións. Este ano son eles os culpábeis de que a nosa vila continue na dinámica de sempre e se vexa privada do que nos corresponden como cidadáns galegos. Qué nos van vender agora?

O Colectivo Nacionalista de Marin vai-se dirixir ao Presidente da Xunta de Galiza, o Sr. Touriño, para lembrarlle algunhas das necesidades historicas, reivindicadas dunha forma ou doutra polos distintos colectivos e asociacións da nosa vila, como son:

A construcción dun novo Centro de saude
A construcción dunha nova biblioteca, petición efectuada recentemente pola concelleira delegada de cultura ante a Conselleria de Cultura.
A construcción do pavillón de Seixo.
A protección e posta en valor do amplo património arqueolóxico que temos en Marin, e no Morrazo.
O saneamento integral do rural, a segunda fase no Campo xa é unha promesa en firme do Conselleiro de Medio Ambiente e esperamos que a cumpla.
A construcción das tan necesarias vivendas sociais.
A mellora das vias de comunicación do morrazo que melloren a comunicación interna da nosa comarca, non so a construcción de vias de alta capacidade para os turistas.
O proxecto de beirarruas de Mogor e Seixo que xa tiña que estar feito.
Unha nova garderia para os nenos.
Un centro de dia para os maiores.

Tan só demandamos que se nos de un trato xusto e equitativo, similar ao resto das vilas do noso entorno e en consonancia co numero de habitantes que ten o noso concello. Pedimoslle a este governo, como lle pedimos ao anterior e lle pediremos ao que veña, que non se teña en conta a cor política de quen governa en cada momento á hora de repartir os cartos públicos, e que no debate no parlamento galego se teñan en conta as necesidades reais de Marin.

Marin, 28 de outubro de 2005