Que tal e como estipula a LEI 3/1983, do 15 de xuño, de Normalización Lingüística (D.O.G.: 14/7/83) o galego é a lingua propia de Galiza e os cidadáns temos o dereito ao uso desta lingua, oralmente e por escrito, nas nosas relacións coa Administración Pública no ámbito territorial galego. A devandita lei tamén estipula que os poderes públicos de Galiza promoverán o uso normal da língua galega, oralmente e por escrito, nas suas relacións cos cidadáns.

Contrariamente a isto, tanto a documentación oficial como o proprio nome do Porto de Marin non figuran en absoluto nesta lingua, senón que únicamente en castelán. Neste sentido, resulta especialmente rechamante o rótulo da entrada principal do Porto no que tan só figura o nome en español.

Polo que solicita,
Que a corporación municipal, como parte integrante do Consello de Administración da Autoridade Portuária, inste á Autoridade Portuaria de Marin e Ria de Pontevedra a que tanto a documentación oficial así como a rotulación do Porto de Marin se realice en lingua galega, dado que o texto da Lei de Normalización Lingüística tamén establece que os cargos públicos promoverán o uso da lingua galega e que a rotulación pública deberá ser sempre a galega de acordo coa forma única dos nosos topónimos.

Marín, 20 de febreiro de 2004.

Asdo.: Sara Montenegro Piñeiro

SR. ALCALDE – PRESIDENTE DO ILMO. CONCELLO DE MARÍN