A Conselleira Caride apresenta proxectos sen prazos nen financiación

A conselleira de política territorial, na súa recente visita a Marin, lanzou unha serie de “promesas” relativas a investimentos nunha zona de ocio, un aparcadoiro soterrado e sobre o tan manido auditório. Polo momento, e que nos coñezamos, a conselleira non explicou como tiña previsto financiar estes investimentos, nen cal ian ser os prazos de execución.
Como xa denunciamos anteriormente nos orzamentos da Xunta non existian partidas para estes grandiosos investimentos, tan só uns poucos euros para o auditório pero como xa indicou a conselleira o proxecto vai ser modificado e terá que ser adaptado aos prezos actuais.
Todo isto deixa entrever o comezo da campaña pre-eleitoral do PSOE en Marin, que tenta vendernos promesas a pouco menos dun ano das eleicións, sabendo que nengun destes proxectos estará listo este ano. Ademáis, provocará un novo episódio do culebrón ao que xa nos teñen acostumdos os dous sócios no governo da Xunta, PSOE e BNG, que son incapaces de apresentar-se como un único governo con propostas unificadas.
A Consellaria, o Concello e máis a Autoridade Portuaria chegaron a un acordo mediante o cal este ultimo cede terreo en favor do Concello. Neste novo espazo preve-se nun futuro construír un grande centro comercial ademais dun aparcadoiro. En definitiva, con cartos públicos pretende-se construir un centro comercial e un aparcadoiro que despois pasarán a ser xestionado pola “iniciativa privada”. Éste é o que os nosos governantes chaman ocio, e nos negócio.
Se ben é certo que Marin está falto de zonas onde aparcar, o Colectivo Nacionalista non considera unha alternativa valida un aparcadoiro de pago que elimine as actuais zonas de aparcamento. Somos partidários de actuar nesa zona, pero tamén somos conscientes que se vai criar un problema de aparcamento no centro de Marin, pois van ser sustituidas unhas prazas gratuitas por unhas de pago. Son necesárias alternativas de aparcamentoe e sobre todo de sustitución do coche como médio de transporte para vir a Marin.
Mentres Marin carece dun centro de saúde decente, unha nova biblioteca que colme as necesidades de tod@s @s veciñ@s, un centro de día para @s nos@s maiores, vivendas sociais, e a Xunta pretende con cartos públicos construír un grande centro comercial, fomentando o consumo insaciábel á par do negocio privado. Nos demandamos que o centro de ocio sexa realmente de ocio, cultura e esparcimento do povo, que se construa unha nova biblioteca adaptada as necesidades dos usuários, estudantes e non estudantes, que desexan acceder dun xeito moderno a libros e ás novas formas de comunicación.
A construción dunhas salas de cine nese centro comercial, parece-nos unha broma de mal gosto, xa que se noutras cidades como Pontevedra non son rendíbeis e teñen que pechar, que lles fai pensar a estes “polític@s profesionais” que estas salas van funcionar no noso concello? Ou é que acaso o fan cun fin social?
En canto á construcción do auditório no parque Eguren, parecenos unha vez máis que estamos ante un novo anúncio irreal xa que vai acompañado, segundo manifestou a conselleira, dunha modificación do proxecto aprovado. Sairá outro a concurso? Vai-se modificar o anterior? Vai-se ter en conta o impacto que vai ter sobre un parque no centro da vila que de uso e disfrute de moitisimos marinenses?
Dende o Colectivo Nacionalista gostariamos que o Concello buscara verdadeiras alternativas de “ocio” e non de “negocio” para eses espazos.

Marin, 8 de xuño de 2006.